TARIGUVLARIM

Tarıguvlarım üçdüle, kızla,
Aytırga au'zuma küçdüle,
Ayt dey esegiz, barın da aytayım,
Barı da esime tüşdüle.

***

Entda caz başı kelgendi, kızla,
Siz kırtişleni oyuguz.
Aziyanı işin biz ta'usmabız,
Bir solumaga koyuguz!

***

Kollarıbızga getmenle alıp,
Biz kırtişleni oyabız.
Allahha iynanñgan bizge iynansın,
Biz canıbızdan toyganbız.

***

Eter karıvubuz kurudu endi,
Bizni eltip, suvga atsınla.
Bizge bu işni sınathan itle,
Oy, kara cerge batsınla!

***

Nasıpsız halkga er kişi cokdu
Kabırıbıznı kazarga.
Tenñgizni suvu şakaga cetmez
Körgenlerimi cazarga.

***

Akılıbıznı cıyayık endi,
Bu kıyınlıknı körgenle,
Segiz adamın Aziyaga eltip,
Ekisin alıp kelgenle!

***

Oy, başıbızdan kün kızdıradı,
Ak korgaşinley eritip.
Bu ebizege ne hata etgen edik,
Bizni bıllay bir termiltip?

***

Tögeregimde men tabalmayma
Algınñgı tau'lu nür betni.
Kaytıb a, kayrı kaytayık endi?
Cartısı kırılgand milletni.

***

<< artga