İtle buşuvlu uluyla, canım,
Kiştikle -açı makıra,
Eşikle katı kagıladıla,
Üydegileni çakıra.

***

Uşkok kalakla tiyelle, canım,
Terk açılmagan eşikge.
Anası üsüne kaplandı, deydi,
Sabiy seskenñgen beşikge.

***

Tañg ertten, canım, ne bolup kaldı,
Bilmey turganlay Malkarga?
Kıyama künü cetdi mi, deydi,
Bu mart ayında har targa?

***

Taulaga kaçıp baralla, canım,
İzgiltin bolgan a koyla.
Endi etillik bolur mu, deyse,
Malkarda algınça toyla?

***

Har üyge kirip, okuyla, canım,
Kralnı katı buyrugun,
Malkar halknı va bılaydan, deydi,
Kayrı ese da kururun.

***

Kıyama künñge uşaydı, canım,
Tögerek -sıyıt, hadaga.
Birça Allahha biz tayanayık,
Madar cokdu da kadarga.

***

Tıgırıklanı kişnep baradı
Bılaydan kaçhan tor atıñg.
Har üy sayın a bölgendi, deydi,
Stalin üç da soldatın.(1)

***

Aş, hapçuk zat da alalmaydıla
Karuvsuz kartla, sabiyle.
Caşla askerde kaldıla ansı,
Cetmez edile bu künle.

***

Şkol(2) allında saklaydı, canım,
Bizni eltirik maşina.
Andan a karap, sarnaydı ana,
Kara kan cavup başına.

***

Malla taralıp müñgüreydile:
«Kimge koyasız bizni?» -dep.
Ay, kıyınlı halk, sañga bolmaz mı
Ullu Allahdan bir sebep?

***

Biz curtubuznu koyup barabız,
Kimle kararla tavlaga?
Umutubuznu üzüp ketmeybiz,
Allah cetdirir cau'laga.

***

Ogurlu kartla maşinaladan
Cilâp karayla da artha,
Kaytmazlıkların seze bolurla
Candan bagalı bu curtha.

***

Cilâu', hadaga, kıçırık, -urup,
Bizni talagan suv mudu?
Barı da birge koşulup, burup, -
Cahanim degen bu mudu?!

***

Çıgıp barabız biz Malkar tardan,
Ala barırmek ak kardan?
Sekirip ketsek edi va cardan.
Ne hayır bolur biz bardan?

***

Kart, maşinadan sekirip tüşüp,
Cerni kuçaklap, cilâdı,
Ol, tobuklanıp, ol, du'a tutup,
Allında taşnı sıladı.

***

Oy, sau kalıgız, siz tau'lu elle,
Karagan közge asuvla.
Oy, sau kalıgız, kiyikli cerle,
Siz, biyik tau'la, terk suvla!

***

Oy, tuvgan cerim, ogurlu curtum,
Sen sau kal, canım, salamat!
Korkma, biz kaytıp kelirbiz artha,
Allahha bol sen amanat!..

***

Sau kalganıbız kaytırbız artha,
Allahdan bir buyruk bolsa,
Halklaga teyri eşik açılıp,
Etgen tilekleri tolsa!..

***

1 soldat - asker
2 şkol - okul