BİZNİ ÜYLERİBİZ KALDILA, EŞİKLERİ KEÑÑGE AÇILIP


Oy, anam carlı, ne aman kuruydu
Tau elibizde üyübüz.
Segizinçi martda muthuz çıkgandı
Carık tiyüvçü künübüz.

***

Carık dunyaga muthuz kün çıgıp,
Bügün karañgı etgendi.
Alga, Karaçay, seni köçürüp,
Kezüv bizge cetgendi.

***

Maşinala bir köp keledile,
Tau avuzlaga çaçılıp.
Üyleribiz a kalıp kalalla,
Eşikle keññge açılıp.

***

Adam atlatmay, alay koydula,
Tögeregibiz tıyılıp.
Biz hariple ma alay kalganbız,
Borbaylarıbız kıyılıp.

***

Satlık mallanı kuygança bizni
Maşinalaga kuydula.
Keltire kelip, Nalçik şaharda
Vagonlaga terk cıydıla.

***

Közümü üsünden ketmeydi, anam,
Allıbız tau'nu biyigi.
Kuvv özenlede kalay caşasın
Kafkaz tau'lanı kiyigi?

***

Kalay nasıplı canlalla, anam,
Kafkaz tau'lada turlukla.
Bizge küygenden cerge kirelle
Bu cerleden çıkgan kırdıkla.

***

Bu kıyınlıknı bizley körgenle
Köp buşuv-buşman etdile.
Biz haripleni Orta Aziyaga
Saban urluklay sepdile.

***

Carık betibiz bir saz bolgandı,
Cokdu algınñgı nürübüz.
Kişi cerinde kırılıp ketdi
Bizni ekiden biribiz.

***

Kıynalgan üçün öllük tüyülbüz,
Ua'htı cetip ölmesek.
Endi Kafkaznı körlük bolmabız,
Tansık tüşlede körmesek.

***

Bu kıyınlıknı bizge sınathan
Biz sınagannı sınasın!
Biznikileça, karuvsuzları
Kırılıp, añga cilâsın!

***

Oy, bizni coygan, ol kim ese da,
Biz kabılganlay kabılsın!
Etgen hatası başına cetip,
Halk cau'vu bolup tabılsın!