Soruv-cuvab

HALKNI SANINA KALLAY BİR KOŞULGANDI?

Ötgen cılda gazetni al betinde «Karaçay milletni sanı» degen rubrikanı* bek caratıb okub turganbız. Rossiyanı regionlarında cerdeşleribizni sanın bilir üçün, «Karaçaynı» har cañgı nomerin aşıgıb saklaganbız. Sau boluguz!

Karaçay-Çerkesiyada caşagan başha milletleni keleçileri ua tışında kallay bir bardıla? Art cıllada karaçaylılanı sanı da kallay birge ösgendi? Ol statistikanı basmalasagız, bek razı bolluk edik.

BOTAŞLANI Aliy-Murat.

Karaçaevsk ş.

Bagalı Aliy-Murat karnaşıbız! Har milletni keleçileri kalayda, nença bolganların mından alda bardırılgan tergeule açıklagandıla. Ol statistika «Karaçay» gazetde da basmalanñgan edi. Sizni tilegigizni kabıl ete, bügün başha milletleni üslerinden da hıysablanı basmalaybız.

Kuru karaçaylılanı, çerkeslileni, abazalılanı emda nogaylılanı üslerinden basmalab koymay, malkarlıla bla baylamlı statistikanı da hazırlaganbız.

Cañgı tuugan sabiyleni sanı bla KÇR-de
Habez emda Karaçay rayonla alçıdıla.

2010-çu cılda Rossiyada entda bir kere adam sannı tergeu bardırıllıkdı. Ol cumuşnu miyik daracada bacarır üçün, Rossiyanı Pravitelstvosu* tıyınşlı begim algandı.

2002-çi cılda bardırılgan tergeu demografiya bolumnu igi kesekge türlendirgendi. Ol statistikanı igi canına türlendirirge har karaçay üydegini da madarı bardı: kelir eki cılnı içinde har adamıbız sabiy kurauga tıyınşlı es bölse, milletibizni sanı kısha zamannı içinde tañg kesekge öserikdi.

1989-çu cılda RSFSR-de karaçaylılanı sanı 150.332 adam bolgandı. 2002-çi cılda ol san % 27,83 ösgendi. 19 cılnı mından alga Malkarlılanı sanı 78.341 edi. SSSR kurugandan sora Rossiyada birinçi sanaulanı közüvüne malkarlıla % 38,40 aslam bolgandıla. Bu sanla bek açık körgüzedile karaçaylıladan ese malkarlını demografiya bolumları macal bolganın.

İñguşlulada ua, köb sabiy kurau bla baylamlı, burundan kelgen adet kurumagandı. 1989-çu cılda bu milletni adam sanı 215.068 edi. 2002-çi cılga ua, 92,03 protsentge ösüb, 413.016 bolgandı. Ol sebebden iñguşluladan ülgü alırga kerekdi bıyıl üydegige atalgan cılda.

Gazetni informatsion kullugu.

2008 c. yanvarnı 10 №1 (10 083) “ K A R A Ç A Y ”